Ang bawat isa sa atin ay may taglay na natatanging katangian at kasanayan na siyang nagbibigay ng karagdagang kulay sa ating pagkatao. Pinapahusay din nito ang ating kakayahan sa iba't ibang larangan.
Ang mga katangian at kasanayang ito ay hindi lamang namana mula sa ating mga magulang o angkan, kundi resulta rin ng ating mga karanasan, edukasyon, at maging ang ating kapaligiran.
Sa artikulong ito, tatalakayin natin kung bakit mahalagang isaalang-alang ang mga katangian at kasanayan, at paano ito makakaapekto sa bawat aspeto ng ating buhay.
 |
Ang pagkilala at pagpapahalaga sa ating mga katangian at kasanayan ay hindi lamang mahalaga sa personal na pag-unlad, kundi pati na rin sa paghubog ng ating relasyon sa kapwa natin. Sa pamamagitan ng mga ito, tayo ay natutulungan din sa pag-abot ng ating mga pangarap sa buhay.
Mahalagang bigyang-pansin ang ating mga katangian at kasanayan sa maraming aspeto kagaya ng mga sumusunod.
Pagpili ng Propesyon
Ang bawat trabaho o propesyon ay may kanya-kanyang abilidad, kasanayan at katangian na hinahanap. Ang pagkilala sa ating sarili at paghulma ng ating mga kasanayan at katangian ay makakatulong sa pagpili ng kursong akma sa atin.
Personal na Pag-unlad
Ang pagkilala at pagpapahalaga sa ating mga katangian at kasanayan ay makakatulong din sa pagbuo ng tiwala para sa ating sarili. Nagiging gabay rin ito sa pagtukoy kung anong aspeto pa ang kailangan nating pagtuunan ng pansin at paunlarin.
Mas Epektibong Pakikipag-ugnayan
Sa pagkilala sa ating mga katangian, mas madali nating maipapakita ang ating tunay na sarili sa iba. Sa pamamagitan nito, mas madali rin nating naiintindihan ang iba't ibang tao at mas nagiging epektibo ang ating pakikipag-ugnayan sa iba.
Pagtukoy ng mga Potensyal at Abilidad
Ang pag-alam sa ating mga kasanayan ay nakakatulong din sa pagtukoy ng ating mga potensyal at sa mga bagay na maaari nating marating sa hinaharap. Sa pamamagitan ng mga ito, mas nagiging ganado tayo sa mga bagay na mahalaga sa atin dahil maliban sa pangarap, tayo ay mas nagiging motibado dahil alam natin na doon tayo magaling.
Pagtugon sa Hamon ng Buhay
Sa pagharap sa mga hamon ng buhay, ang pagkakaroon ng sapat na kasanayan at tamang katangian ay maaaring maging maging sandata at sandigan upang malagpasan ang mga unos na ito.
Pagpapahalaga sa Sarili
Ang pagkilala at pagpapahalaga sa ating mga katangian at kasanayan ay isa ring paraan ng pagpapahalaga sa ating sarili. Natutukoy natin kung sino talaga tayo, kung saan tayo magaling at kung ano-ano ang mga kahinaan natin. Nakakatulong din ito sa pagbibigay-direksyon sa ating mga desisyon at kilos sa buhay.
Sa kabuuan, ang mga katangian at kasanayan ay mahalaga sa personal, sosyal, at propesyonal na aspeto ng ating buhay. Ang pagkilala at pagpapahalaga sa mga ito ay nagbibigay ng direksyon, layunin, at kahulugan sa ating mga ginagawa at nais marating. Kaya kailangan talaga nating kilalanin ng mabuti ang ating mga sarili at dapat na isaalang-alang ang mga katangian at kasanayan na siyang nagrerepresenta sa atin.