Ano ang Balbal? – Kahulugan Nito at mga Halimbawa ng Salitang Balbal
Dynamic kung sabihin sa Ingles, ang wikang Filipino ay patuloy na sumasabay ng pag-unlad ng iba't ibang aspeto ng ating kultura at lipunan.
Isa sa mga kakaibang bersiyon ng pagsasalita ang tinatawag nating balbal o salitang kalye, na kadalasang nagbibigay kulay at karakter sa ating pang-araw-araw na komunikasyon.
Maliban sa pagtalakay sa kahulugan nito, atin ding aalamin ang kahalagahan ng balbal, at ilang sikat na mga halimbawa.
{tocify} $title={Table of Contents}
Ano ang Balbal? Kahulugan o Meaning ng Balbal
Ang balbal ay mga salitang hindi pormal o opisyal at kadalasang naririnig sa mga kalye. Dahil dito, kilala din ito sa tawag na salitang kalye.
Ang mga balbal ay madalas marinig sa araw-araw nating pakikipagkomunikasyon, lalong-lalo na sa mga kabataan.
Ang bawat salitang kalye ay may kanya-kanyang kahulugan at gamit depende sa konteksto. Minsan ay nakakatuwa pa ang mga ito lalo na kung nagkwekwentuhan.
Basahin Din: Ano ang Panghalip? Kahulugan at Mga Halimbawa Nito
Mga Halimbawa ng Balbal o Salitang Kalye
1 Mga Drayber at Pasahero
May mga balbal na karaniwang ginagamit sa pang-araw-araw na komunikasyon ng mga drayber at mga pasahero lalo na pampasaherong jeep. Narito ang ilang halimbawa.
Pasada - ito ang tawag sa karaniwang biyahe o ruta ng jeep.
Barya - ito ang ibinabayad ng pasahero na kailangang-kailangan lalo na sa umaga.
Kundoktor - Ang tawag sa taong tagapangasiwa, tagatawag at tagatanggap ng bayad mula sa mga pasahero.
Sabit - Ang aksyon ng pagkakabit o pagsakay ng pasahero ng nakatayo.
Pakyaw - ito ang pag-upa sa buong jeep para sa isang partikular na biyahe.
123 - ito naman ang tawag sa mga taong hindi nagbayad ng pamasahe at bigla na lang bumaba.
2 Mosang Codes
May mga balbal din na nabuo at patuloy na ginagamit dahil sa mga taong mahilig mag-tsismis o mga tsismosa. Narito ang ilang halimbawa.
Marites - ito ang paboritong tawag sa mga tsismosang tagahatid ng bagong tsismis. Ito ang pinaikling bersyon ng "Mare, ito ang latest."
Marietta - ito naman ang tawag sa tagahatid ng update sa sinusubaybayang tsismis. Ito ang pinaikling bersyon ng "Mare, eto pa."
Marissa - ito ang tagadagdag ng detalye. Mas pinaikling bersyon ito ng "Mare, isa pa."
Marisol - ito ang nagdadagdag ng liyap sa umaapoy na balita. Ito ang pinaikling bersyon ng "Mareng tagasulsol."
Maris - ito naman ang tawag sa mahilig lang makinig sa tsismis. Mas pinaikling bersyon ito ng "Mare, ano ang tsismis?"
Marina - ito ang mas pinaikling bersyon ito ng "Mare, ano na?"
Mariposa - ito naman ang taga-post ng tsismis. "Mare, post mo na."
3 E-Lingo o Online Jargon
Ang online jargon ay mga salitang ginagamit sa cyberspace o internet na may kakaibang kahulugan depende sa konteksto ng pag-uusap. Madalas itong ginagamit para sa mas mabilis na pakikipag-usap sa online community. Narito ang ilang halimbawa.
LOL - laughing out loud; ginagamit kapag may nakakatawang sinabi o nangyari.
BRB - be righ back; ginagamit kapag pansamantalang aalis.
DM - direct message; pribadong mensahe sa isang tao.
Troll - mga panggulo o nang-aasar online.
Meme - Isang larawan, video, o tekstong may humor na mabilis kumalat online.
4 Slang ng mga Estudyante at Kabataan
Ang mga salitang ito naman ay kadalasang ginagamit ng mga estudyante at kabataan depende sa kanilang grupo o komunidad. Narito ang ilang halimbawa.
Petmalu - salitang binaliktad na ang ibig sabihin ay malupet o astig.
Werpa - salitang binaliktad na ang ibig sabihin naman ay pawer o power, para dagdagan ang enerhiya o ipahayag ang pag-suporta.
Lodi - ito naman ang taong hinahangaan. Mula ito sa binaliktad na idol.
5 Gay Lingo
Ang Gay Lingo naman ay isang uri ng balbal na ginagamit ng LGBT+ community. Ito ay nagbibigay ng kakaibang kulay sa kanilang paraan ng pagsasalita. Narito ang ilang halimbawa.
Chika - ang ibig sabihin ay balita.
Charot o char - ito ang katumbas ng just kidding, na ang ibig sabihin ay joke lang o hindi totoo.
Junakis - ang ibig sabihin naman nito ay anak.
Tomjones - sinasabi kapag gutom na.
Babush - sinasabi naman ito kapag aalis na.
Paalala sa Paggamit ng Balbal
Sa paggamit ng balbal, mahalaga na tandaan na gamitin ito nang may responsibilidad at respeto sa kapwa.
Bagama't hindi masama, huwag na huwag gagamitin ang mga balbal para insultuhin o saktan ang iba. Siguraduhin din na ipaintindi mo ito sa iyong kausap kung siya'y naguguluhan dahil sa paggamit mo ng mga balbal.
Pangwakas - Ang Balbal Bilang Yaman ng Wika
Sa kabuuan, ang mga salitang balbal ay tunay na kakaiba at nakakamangha. Sabi nga nila, bahagi ito ng natural na katangian ng ating wika, at kagaya natin at ng alin man sa mundo, patuloy din itong naiimpluwensiyahan ng pagbabago.
Gayunpaman, mahalagang tandaan na kailangang isaisip at isapuso ang orihinal na estruktura at mga salita sa wikang Filipino. Sana ay may natutunan kang bago, at kung ikaw ma'y nagalak, pwede mo rin itong ibahagi sa iba pa.